ٹرمپ نے معذور بچے کا مصافحہ نظر انداز کردیا

واشنگٹن: امریکی صدر ڈونلڈ ٹرمپ روز ہی اپنی کسی نہ کسی حرکت کے باعث دنیا بھر کی تنقید کا نشانہ بن جاتے ہیں۔ حال ہی میں ان کی ایک اور ویڈیو سوشل میڈیا پر تنقید کی زد میں ہے جس میں ٹرمپ ایک ننھے معذور بچے کا مصافحہ نظر انداز کر کے آگے بڑھتے دکھائی دے رہے ہیں۔

گزشتہ روز وائٹ ہاؤس میں ایک تقریب منعقد ہوئی جس میں کئی ننھے بچے بھی موجود تھے۔ انہی میں سے ایک بچہ وہیل چیئر پر بھی بیٹھا تھا جو صدر ٹرمپ کی طرف نہایت پرشوق نظروں سے دیکھ رہا ہے۔

صدر ٹرمپ مہمانوں سے ہاتھ ملاتے ہوئے آگے کی طرف بڑھ رہے ہیں، اسی دوران بچے نے اپنا ہاتھ ٹرمپ کی طرف بڑھا دیا جسے ٹرمپ نے دیکھنا بھی گوارا نہ کیا۔

اس کے تھوڑی دیر بعد جب ٹرمپ بچے کے قریب پہنچے تب بھی وہ بچہ فضا میں ہاتھ بلند کیے ٹرمپ کی نگاہ کرم کا منتظر ہے لیکن ٹرمپ نے اس بار بھی اسے بالکل نظر انداز کردیا اور آگے چلے گئے۔

اس سے تھوڑی دیر قبل ہی اسی تقریب میں اپنی تقریر کے دوران ٹرمپ نے معذور بچوں کو اوباما ہیلتھ کیئر بل سے متاثر بچوں کا نام بھی دیا تھا۔

سماجی رابطوں کی ویب سائٹ ٹوئٹر پر ٹرمپ کے اس تغافل کو نہایت دکھ بھرا قرار دیا جارہا ہے۔

قالب وردپرس

Loading...