تحریک عدم اعتماد سے قبل اسلام آباد انتظامیہ کا اہم فیصلہ، وفاقی دارالحکومت کے ریڈ زون کو مکمل سیل کرنے کا فیصلہ، سیکورٹی انتظامات مزید سخت کر دیے گئے۔ پولیس اور انتظامیہ نے کل بروز ہفتہ کے قومی اسمبلی اجلاس کیلئے تیاریاں مکمل کرلیں۔پولیس حکام کے مطابق ہفتہ کو ریڈ زون کو مکمل طور پر سیل کیا جائے گا، پارلیمںٹ جانے کیلیے صرف مارگلہ روڈ کا راستہ کھلا رکھا جائے گا۔
حکام کے مطابق ریڈ زون کے اطراف احتجاج یا جشن منانے کے لیے لوگوں کو جمع نہیں ہونے دیا جائے گا۔پولیس حکام کے مطابق جناح ایونیو پر چائنا چوک اور ایمبیسی روڈ سے راستوں کو سیل کیا جائے گا۔پولیس حکام کے مطابق اسلام آباد، پنجاب پولیس اور رینجرز کی نفری ریڈ زون میں تعینات ہوگی۔

پولیس حکام کے مطابق ہفتہ کی صبح 6 سے دوپہر تک اسلام آباد کے انٹری پوائنٹ پر سخت چیکنگ ہوگی۔

دوسری جانب قومی اسمبلی میں تحریک عدم اعتماد پر ووٹنگ کیلئے کل بروز ہفتہ کو طلب کیاےجانے والے اجلاس کا 6 نکاتی ایجنڈا بھی جاری کردیا گیا ۔قومی اسمبلی سیکرٹریٹ سے جاری اعلامیے کے مطابق قومی اسمبلی کا اجلاس 9اپریل 2022 بروز ہفتہ صبح ساڑھے 10 بجے طلب کیا گیا ہے۔چھ نکاتی ایجنڈے کے مطابق اجلاس کا آغاز تلاوت قرآن پاک سے ہو گا، پھر حدیث و نعت خوانی کے بعد قومی ترانہ بجایا جائے گا۔
اس کے بعد الگ سے سوالات شامل کیے جائیں گے جس کے بعد فہیم خان توجہ دلاؤ نوٹس پر کنٹونمنٹ بورڈ میں کونسلرز کو تنخواہوں کی عدم ادائیگی کا معاملہ اٹھائیں گے۔ایجنڈے میں چوتھا آئیٹم تحریک عدم اعتماد پر ووٹنگ کا ہے۔قومی اسمبلی میں قائد حزب اختلاف میاں محمد شہباز شریف نے 28 مارچ 2022 کو درج ذیل قرارداد پیش کر کے ووٹنگ کی درخواست کی تھی، اس قرارداد کے مطابق، ’اس قرارداد کے ذریعے آئین کے آرٹیکل 95 کی شق (1) کے تحت اسلامی جمہوریہ پاکستان کا یہ ایوان قرار دیتا ہے کہ اسے وزیر اعظم عمران خان پر عدم اعتماد ہے اور اس کے نتیجے میں وہ شق (4) کے تحت عہدہ چھوڑ دیں۔
اس کے علاوہ پوئنٹ آف آرڈر کے علاوہ رول18 کے تحت معاملات اٹھائے جائیں گے جبکہ توجہ دلاؤ نوٹس میں پیٹرولیم مصنوعات کی بڑھتی ہوئی قیمتوں پر بات کی جائے گی۔