پی ڈی ایم چاہتی ہے فوج حکومت گرائے ، عمران خان

On جون 5, 2021

وزیر اعظم عمران خان نے کہا ہے کہ خود کو جمہوری کہنے والی پاکستان ڈیموکریٹک موومنٹ فوج کو کہہ رہی ہے کہ حکومت گرا دو ‘این آراونہ ملنے پر یہ لوگ حکومت گرانے کیلئے کچھ بھی کرنے کوتیارہیں ‘ان کی جنگ ذاتی مفادات کیلئے ہے ‘ ان کے اربوں ڈالر باہر پڑے ہیں‘ ان کی ساری چوریاں سامنے آ رہی ہیں‘ انہیں ڈر ہے حکومت پیسے واپس لے آئے گی۔ ان کی کوشش ہے کہ کسی طرح حکومت گرادیں‘قیام پاکستان کے بعد نظام بدلنے کے لئے سب سے بڑی جدوجہد اس وقت جاری ہے‘مافیا اس کی ناکامی کے لئے کوشاں ہے تاہم یہ جدوجہد ہماری نسلوں کے لئے اہم ہے‘ پہلے بیروزگاری اورآئی ایم ایف کا دباؤتھا‘برا وقت نکل گیا۔ اب معاشی ترقی‘ دولت میں اضافے اور نوجوانوں کو نوکریاں دینے کا وقت ہے‘ جیسے ہی ہم حکومت میں آئے توکہا گیا کہاں ہے نیا پاکستان؟ لیکن ہم نے ڈھائی سال بہت صبر سے گزارا، میڈیا نے بھی تاثر دیا کہ بٹن آن کرکے نیا پاکستان بن جائیگا‘میرے اپنے لوگوں کو مشکل وقت سے گزرنا پڑا ‘آنے والے دنوں میں قوم کو مزید خوشخبریاں دیتا رہوں گا۔ کسانوں کے لئے جو پیکج لارہے ہیں اس سے 60 کی دہائی کا انقلاب ایک بار پھر آئے گا۔ ان خیالات کا اظہار انہوں نے جمعہ کو لودھرا ں تا ملتان شاہراہ کی اپ گریڈیشن و بحالی کے منصوبے کے سنگ بنیاد کی تقریب سے خطاب کرتے ہوئے کیا۔ وزیراعظم نے کہا کہ جب ہماری حکومت آئی تو پہلے ہفتہ ہی یہ سوال اٹھانا شروع ہو گئے کہ کہاں ہے نیا پاکستان اور حکومت کی ناکامی کی باتیں شروع ہو گئیں، ہم نے اڑھائی سال بڑے صبر سے گزارے، اپوزیشن کے بارے میں علم تھاکہ این آ ر او ملنے تک تنقید جاری رکھے گی، میڈیا میں بھی ہمارے اوپرتنقید ہو رہی تھی،یہ بہت مشکل وقت تھا جس سے گزرنا پڑا، ہر روز ہم پر تنقید کی جاتی تھی، میڈیا نے یہ تاثر دیا تھاکہ کوئی بٹن دبانے سے نیا پاکستان بن جائے گا۔ وزیراعظم نے کہا کہ تبدیلی جدوجہد سے آتی ہے،قائد اعظم کی جدوجہد کو دیکھیں تو اس میں بھی نشیب و فراز آتے رہے، ایک وقت وہ دلبرداشتہ ہو کر برطانیہ چلے گئے۔ کے بعد پاکستان کا نظام بدلنے اور مافیا سے آزادی کے لئے یہ بڑی جدوجہد ہے‘یہ قانون کی حکمرانی کی جدوجہد ہے،اس سے ہی معاشرے نے بدلنا ہے، طاقتور کو قانون کے تابع کرنا ہے۔ سارے خوشحال ممالک میں قانون کی حکمرانی ہے، وہاں کوئی قبضہ مافیا، چینی مافیا اور سیاسی مافیا نہیں۔ پی ڈی ایم اپنے آپ کو جمہوری کہتی ہے لیکن فوج کو کہتی ہے کہ حکومت گرادو ، ان کی جنگ ذاتی مفادات کی جنگ ہے

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ